Nyu-York meri Maduroni hibsga olishga qarshi chiqdi
Zohran Mamdani Tramp bilan bog‘lanib, Maduroning qo‘lga olinishini rejimni zo‘ravonlik bilan o‘zgartirishga urinish deb baholadi.
Nyu-York shahri meri Zohran Mamdani Donald Tramp bilan telefon orqali bog‘lanib, Venesuela prezidenti Nikolas Maduro va uning rafiqasining qo‘lga olinishi ortidan amalga oshirilgan harakatlarga qarshi ekanini ma’lum qildi. Bu haqda Anadolu nashri xabar berdi.
Mamdani matbuot anjumanida so‘zlar ekan, mazkur qo‘ng‘iroq orqali AQShning Venesueladagi harakatlarini “hokimiyatni zo‘ravonlik bilan almashtirishga urinish” sifatida baholaganini va bunga qat’iy norozilik bildirganini aytdi.
“Men prezidentga bevosita qo‘ng‘iroq qilib, ushbu harakatga qarshi ekanimni ochiq aytdim. Bunday amallar federal va xalqaro huquq me’yorlariga zid bo‘lib, ular doimiy va bir xil tarzda hurmat qilinishi kerak”, — dedi Mamdani.
Avvalroq u X ijtimoiy tarmog‘idagi sahifasida AQShning Venesueladagi operatsiyasini “urush harakati” va “ochiqdan-ochiq rejimni o‘zgartirishga urinish” deb atagan edi.
Merning ta’kidlashicha, Venesuelaga nisbatan amalga oshirilayotgan bunday siyosat nafaqat xorijdagi vaziyatga, balki Nyu-Yorkda yashayotgan o‘n minglab venesuelaliklarga ham bevosita ta’sir ko‘rsatishi mumkin.
“Bizning ustuvor vazifamiz — Nyu-York aholisi, jumladan venesuelalik diasporaning xavfsizligini ta’minlashdir. Shahar ma’muriyati vaziyatni diqqat bilan kuzatishda davom etadi”, — deya qo‘shimcha qildi u.
