Venesuela Oliy sudi mamlakat vitse-prezidentini vaqtinchalik prezident etib tayinladi
Nikolas Maduro qo‘lga olinishi natijasida o‘z konstitutsiyaviy vakolatlarini bajarish imkoniyatidan mahrum bo‘lgan.
Venesuela Oliy sudi mamlakat prezidenti Nikolas Maduroning qo‘lga olinishi ortidan yuzaga kelgan favqulodda vaziyat munosabati bilan ijro hokimiyatida vaqtinchalik o‘zgarishlar kiritdi.
Sudning Konstitutsiyaviy palatasi qaroriga ko‘ra, vitse-prezident Delsi Rodriges Venesuela Respublikasi prezidenti vazifasini vaqtincha bajaruvchi etib tayinlandi. Ushbu qaror davlat telekanali VTV orqali Konstitutsiyaviy palata raisi Karisliya Beatriz Rodriges tomonidan e’lon qilindi.
Qarorda ta’kidlanishicha, Nikolas Maduroning qo‘lga olinishi natijasida u o‘z konstitutsiyaviy vakolatlarini bajarish imkoniyatidan mahrum bo‘lgan.
Shu sababli vaziyat “favqulodda va vaqtinchalik huquqiy imkonsizlik holati” sifatida baholangan.
“Respublika ijrochi vitse-prezidentiga Prezident lavozimiga oid barcha vakolatlar, majburiyatlar va funksiyalarni amaldagi qonunchilik doirasida vaqtincha amalga oshirish topshirildi”, — deyiladi rasmiy bayonotda.
Shuningdek, mazkur chora davlat boshqaruvida uzluksizlikni saqlash, milliy xavfsizlikni ta’minlash va mamlakatning konstitutsiyaviy barqarorligini himoya qilish maqsadida qabul qilingani qayd etilgan.
Eslatib o‘tamiz, 3-yanvarga o‘tar kechasi Karakas shahrida bir nechta portlashlar sodir bo‘lgan.
Hujumlar oqibatida qurbonlar va jarohatlanganlar borligi xabar qilingan.
Venesuela bosh prokurori Tarek Uilyam Saab AQShni Karakasdagi hujumlar uchun mas’ul deb hisoblashini bildirib, Nikolas Maduro va uning rafiqasiga yetkazilishi mumkin bo‘lgan har qanday zarar uchun AQSh hukumati javobgar bo‘lishini ta’kidladi.
