2030-yilga kelib O‘zbekistonda aholining 85 foizi doimiy ichimlik suvi bilan taʼminlanadi

 

“O‘zbekiston–2030” strategiyasining qayta ko‘rib chiqilgan loyihasiga ko‘ra, 2030 yilga kelib mamlakat aholisining 85 foizi ichimlik suvi xizmatlaridan doimiy va barqaror foydalanish imkoniyatiga ega bo‘lishi rejalashtirilmoqda. Ushbu maqsad shaharlar va qishloq hududlarini to‘liq qamrab oladi.

 

Hujjatda qayd etilishicha, ichimlik suvi bilan taʼminlash qamrovi bosqichma-bosqich oshiriladi. Jumladan, 2026 yilda bu ko‘rsatkich 82 foizga, 2027 yilda 83 foizga, 2028 yilda 84 foizga, 2029 yilda 84 foizga va 2030 yilga kelib 85 foizga yetkazilishi belgilangan.

 

Asosiy yo‘nalishlardan biri sifatida Tuyamuyun suv omborini kengaytirish nazarda tutilmoqda. Uning sig‘imini qo‘shimcha 1 milliard kub metrga oshirish rejalashtirilgan bo‘lib, bu 1,2 million gektar maydonda suv taʼminotini yaxshilash va ichimlik suvi zaxirasini shakllantirish imkonini beradi.

 

Shu bilan birga, suvdan oqilona foydalanish bo‘yicha chora-tadbirlar kuchaytiriladi. 2030 yilga kelib suvdan foydalanish samaradorligini 25 foizga oshirish, qishloq xo‘jaligi yerlarining 100 foizini suvni tejovchi texnologiyalar bilan jihozlash rejalashtirilgan. Tomchilatib sug‘orish maydoni 500 ming gektarga kengaytiriladi, ushbu texnologiyalarni ishlab chiqaruvchi mahalliy korxonalar quvvati esa yiliga 300 ming gektarga yetkaziladi.

 

Isteʼmolni aniq hisobga olish maqsadida barcha ichimlik suvi isteʼmolchilarini 100 foiz hisoblagichlar bilan taʼminlash ko‘zda tutilgan.

 

Bundan tashqari, suv xo‘jaligi tizimidagi muammolarni hal etish rejalashtirilmoqda. Xususan, yer osti suvlari sathi muammoli bo‘lgan maydonlar 773,4 ming gektargacha qisqartiriladi. Beton qoplamali magistral va xo‘jaliklararo kanallarning uzunligi 13,1 ming kilometrga yetkazilib, bu ularning umumiy ulushining 46 foizini tashkil etadi. Davlat-xususiy sheriklik asosida boshqariladigan suv xo‘jaligi inshootlari soni esa 2000 taga yetkaziladi.