O‘zbekistonda korrupsiya haqida xabar bergan shaxslarga himoya orderi beriladi
Shuningdek, “Korrupsiyaga qarshi kurashga qo‘shgan hissasi uchun” ko‘krak nishoni taʼsis etilmoqda.
O‘zbekiston Respublikasi Adliya vazirligi maʼlum qilishicha, korrupsiyaga oid jinoyatlar haqida xabar bergan shaxslarga endilikda himoya ordeni beriladi. Ushbu tartib prezident farmoni asosida 2026 yil 1 iyuldan boshlab joriy etiladi.
Shuningdek, korrupsiyaga qarshi kurashga hissa qo‘shgan shaxslarni rag‘batlantirish maqsadida “Korrupsiyaga qarshi kurashga qo‘shgan hissasi uchun” ko‘krak nishoni taʼsis etilmoqda.
Farmonga muvofiq, Raqamli muvofiqlik axborot va dasturiy taʼminot to‘plami sinov rejimida ishga tushiriladi. U quyidagi imkoniyatlarni taqdim etadi:
- Korrupsiyaga qarshi kurash klasteri ishtirokchilari o‘rtasida tezkor maʼlumot almashinuvi;
- E-Komplaens moduli orqali ichki korrupsiyaga qarshi nazorat bo‘linmalari faoliyatini raqamlashtirish;
- Davlat organlari va tashkilotlarga qonun buzilishi holatlarini oldini olish va ularni bartaraf etish bo‘yicha majburiy ko‘rsatmalar va takliflar tizimini joriy etish.
Farmonga muvofiq, korrupsiyaga oid huquqbuzarliklar haqida xabar bergan shaxslar mehnat qonunchiligi doirasida taʼqib va har qanday nohaqliklardan himoyalanadi.
Ushbu chora-tadbirlar O‘zbekistonda korrupsiyaga qarshi kurashni kuchaytirish, shaffoflikni oshirish va jamiyatda adolatli muhitni taʼminlashga qaratilgan.
