Xitoyda litsenziyasiz intervyu va yangiliklar nashr etish taqiqlanadi

 

Pekin shahrining Kibermakon maʼmuriyati 2025 yil dekabr oyida onlayn yangiliklarni nazorat qilish bo‘yicha bir oylik maxsus kampaniyani boshladi. Ushbu tadbir qonunbuzarliklarning oldini olish, yetakchi ommaviy axborot vositalarining taʼsirini kuchaytirish va sog‘lom internet muhitini yaratish maqsadida amalga oshirilmoqda, deb xabar berdi Xitoy Markaziy Televideniyesi (СCTV).

 

Kampaniya doirasida noqonuniy onlayn axborot faoliyati qatʼiy nazoratga olinadi. Xususan, litsenziyasiz intervyular, yangiliklarni to‘plash, tahrirlash va nashr etish, maʼlumotlarni buzib yoki kontekstdan chiqarib ko‘rsatish taqiqlandi. Shu bilan birga, jamoatchilikni chalg‘ituvchi akkauntlar, fotosuratlar va nomlardan foydalanish ham kuzatiladi.

 

Rasmiy bayonotga ko‘ra, ushbu chora-tadbirlar internetdagi salbiy kayfiyat, vahima tarqalishi, fitna nazariyalari va soxta rasmiy bayonotlar tarqalishini oldini olishga qaratilgan. Kampaniya “Toza poytaxt – toza manbalar, haqiqiy ovoz” shiori ostida o‘tkazilmoqda va barcha noqonuniy faoliyatlarni aniqlash hamda bartaraf etish bo‘yicha choralarni o‘z ichiga oladi.

 

Xitoy rasmiylari iyul oyida voyaga yetmaganlar uchun onlayn muhitni himoya qilish kampaniyasini boshlaganini ham eslatdi. Avvalroq esa internetdagi axborot nazorati va kiberhujumlardagi haqoratli so‘zlar ustidan monitoring kuchaytirilgan edi.