2025-yilda 165 mingdan ortiq haydovchi jarima ballarini oldi
2026-yil 1-apreldan jarima ballari avtomatik kameralar orqali qayd etilgan qoidabuzarliklarga ham qo‘llaniladi.
2025-yilda O‘zbekistonda 165 mingdan ortiq haydovchi yo‘l harakati qoidalarini buzganliklari uchun jarima ballarini oldi. Barcha jarima ballarining qariyb uchdan bir qismi yilning so‘nggi ikki oyiga to‘g‘ri keladi.
Bu haqda Yo‘l harakati xavfsizligi xizmati (YXX) matbuot kotibi Zoir Yo‘ldoshev ma’lum qildi.
Qayd etilishicha, yo‘l harakati qoidalarini qo‘pol ravishda buzganlik uchun jarima ballari tizimi 2025-yil 1-iyundan boshlab joriy etilgan bo‘lib, hozirda faqat yo‘l harakati politsiyasi xodimlari tomonidan rasmiylashtirilgan ma’muriy bayonnomalar asosida qo‘llanilmoqda.
Statistik ma’lumotlarga ko‘ra, uch nafar haydovchi 7,5–8 ball, ikki nafar haydovchi 6,5–7 ball, 12 nafar haydovchi esa 5,5–6 ball to‘plagan. Qoidabuzarlarning aksariyati — 165 193 nafar haydovchi — 0,5 dan 5 gacha jarima balliga ega.
Shuningdek, faqat 2025-yil noyabr va dekabr oylarida 50 mingdan ortiq haydovchiga jarima ballari berilgan.
Amaldagi tartibga ko‘ra, jarima ballari qoidabuzarlik sodir etilgan paytda transport vositasini boshqarib turgan haydovchiga rasmiylashtiriladi.
Ma’lum qilinishicha, 2026-yil 1-apreldan boshlab avtomatik foto va videokameralar orqali qayd etilgan qoidabuzarliklar uchun ham jarima ballari hisoblanadi.
YXX shuningdek, 12 oy davomida yo‘l harakati qoidalarini buzmagan haydovchilarga rag‘batlantirish chorasi qo‘llanilishini eslatdi. Bunda kelgusi yilda sodir etilgan birinchi qoidabuzarlik uchun jarima balli hisoblanmaydi. 12 balldan ortiq ball to‘plagan haydovchilar esa haydovchilik guvohnomasidan mahrum etiladi.
