Erdo‘g‘an Tramp bilan Venesueladagi vaziyatni muhokama qildi

 

Turkiya prezidenti Rajab Toyyib Erdo‘g‘an AQSH prezidenti Donald Tramp bilan Venesueladagi vaziyat yuzasidan telefon orqali suhbatlashganini maʼlum qildi. Bu haqda CNN Turk xabar berdi.

 

Davlat rahbarining so‘zlariga ko‘ra, telefon muloqoti chog‘ida Turkiya tomonining mazkur vaziyat borasidagi xavotirlari AQSH prezidentiga yetkazilgan.

 

“Prezident Donald Tramp bilan telefon orqali suhbat davomida mamlakatimizning Venesueladagi jarayonlar bo‘yicha xavotirlarini bildirdik”, — dedi Erdo‘g‘an.

 

U suverenitetning buzilishi va xalqaro huquq normalariga amal qilinmasligi global miqyosda jiddiy muammolarga olib kelishi mumkin bo‘lgan xavfli holat ekanini taʼkidladi. Erdo‘g‘an qonun ustuvorligi o‘rnini kuch ustunligi egallagan sharoitda beqarorlik, inqirozlar va nizolar muqarrar ekanini qayd etdi.

 

Turkiya yetakchisi Venesuela xalqini do‘stona xalq sifatida baholaganini va mamlakatni qo‘llab-quvvatlashda davom etishini bildirdi.

 

Eslatib o‘tamiz, 5 yanvar kuni Venesuela prezidenti Nikolas Maduro ustidan sud jarayonining ilk majlisi Nyu-York federal sudida bo‘lib o‘tdi. AQSH bosh prokurori Pam Bondi Maduro va uning rafiqasini “narkoterrorizm”, qurol saqlash hamda giyohvand moddalar kontrabandasi ayblovlari bilan sudga tortilganini maʼlum qildi. Sudya ishni davom ettirish uchun navbatdagi majlisni 17 mart sanasiga belgiladi.