Farg‘onada Telegram orqali qo‘shni ayolga shilqimlik qilgan yigit 5 sutkaga qamaldi
Ayol sudda ushbu yozishmalar uning ruhiy holatiga salbiy ta’sir qilganini bildirgan.
Farg‘ona viloyatining So‘x tumanida Telegram messenjeri orqali qo‘shni ayolga axloq normalariga zid xabarlar yuborgan 19 yoshli yigit ma’muriy javobgarlikka tortildi. Holat yuzasidan sud qarori e’lon qilindi. Bu haqda "Daryo" xabar bermoqda.
Ma’lum bo‘lishicha, 2006-yilda tug‘ilgan X.D. 2025-yil 26-dekabr kuni qo‘shnisi A.X.ga Telegram orqali bezovta qiluvchi, shilqimlik mazmunidagi yozishmalar yuborgan. Ayol ushbu xabarlar uni ruhiy jihatdan bezovta qilganini bildirgan va ichki ishlar organlariga murojaat qilib, yozishmalar skrinshotlarini taqdim etgan.
Jinoyat ishlari bo‘yicha So‘x tuman sudi ishni ko‘rib chiqib, X.D.ni Ma’muriy javobgarlik to‘g‘risidagi kodeksning 41-1-moddasi 1-qismi bilan aybdor deb topdi. Sud qaroriga ko‘ra, unga 5 sutka ma’muriy qamoq jazosi tayinlandi.
