Toshkentda tunda qo‘lida pichoq bilan yurgan erkak qamaldi
U ko‘p qavatli uylarning birida qo‘shnisining xonadoni eshigini taqillatib, uni bezovta qilgan.
Toshkent shahrida jamoat tartibini buzgan shaxs ichki ishlar organlari xodimlari tomonidan tezkorlik bilan aniqlanib, maʼmuriy tartibda ushlangan. Bu haqda poytaxt IIBB matbuot xizmati maʼlum qildi.
Qayd etilishicha, 5-yanvar kuni soat 01:35 atrofida 1984-yilda tug‘ilgan fuqaro O.S. mast holatda Yashnobod tumanidagi ko‘p qavatli uylarning birida qo‘shnisi D.Y.ning xonadoni eshigini taqillatib, bezovta qilgan. U umumiy foydalanishdagi yo‘lakda bo‘lgan holda sovuq qurol sifatida foydalanilishi mumkin bo‘lgan ashyoni qonunga xilof ravishda olib yurgan va jamoat tartibini buzgan.
Mazkur holat aks etgan video ijtimoiy tarmoqlarda tarqalib, jamoatchilikda xavotir uyg‘otgan. Xabar kelib tushishi bilan tuman ichki ishlar organlari xodimlari tomonidan tezkor choralar ko‘rilib, huquqbuzar maʼmuriy tartibda ushlandi.
Holat yuzasidan Yashnobod tumani IIO FMB tomonidan fuqaro O.S.ga nisbatan Maʼmuriy javobgarlik to‘g‘risidagi kodeksning 183-moddasi (mayda bezorilik), 185-2-moddasi (sovuq qurolni yoki sovuq qurol sifatida foydalanilishi mumkin bo‘lgan ashyolarni olib yurish) hamda 194-moddasi (ichki ishlar organlari xodimlarining qonuniy talablarini bajarmaslik) bilan maʼmuriy bayonnomalar rasmiylashtirildi.
To‘plangan hujjatlar jinoyat ishlari bo‘yicha Yashnobod tumani sudiga yuborildi. Sud qarori bilan huquqbuzarga nisbatan maʼmuriy qamoq jazosi tayinlandi.
