Eron 80 million fuqaroga oylik to‘lovlar joriy etilishini maʼlum qildi
Eron hukumati ommaviy noroziliklar fonida aholini moliyaviy qo‘llab-quvvatlashga urinmoqda.
Eron rasmiylari mamlakatda kuchayib borayotgan iqtisodiy inqiroz va ommaviy norozilik namoyishlari fonida aholiga yangi oylik pul to‘lovlari dasturi joriy etilishini eʼlon qildi. Hukumat mazkur chora orqali ijtimoiy keskinlikni yumshatishni maqsad qilgan.
Inbusiness.kz nashri Bloomberg agentligiga tayanib xabar berishicha, Eron Mehnat vaziri ushbu to‘lovlar taxminan 80 million kishini, yaʼni deyarli butun mamlakat aholisini qamrab olishini maʼlum qilgan. Dastur doirasida fuqarolarga oyiga taxminan yetti dollar miqdorida mablag‘ ajratilishi rejalashtirilmoqda.
Qayd etilishicha, mazkur qaror xalqaro sanksiyalar sabab iqtisodiy vaziyatning keskin yomonlashuvi, shuningdek, neft eksportidan tushadigan daromadlarning kamayishi sharoitida qabul qilingan.
Bloomberg maʼlumotlariga ko‘ra, Eron iqtisodiyoti jiddiy bosim ostida qolmoqda: milliy valyuta qiymatining yarmidan ko‘pini yo‘qotgan, yillik o‘rtacha inflyatsiya darajasi esa 42,2 foizga yetgan. Asosiy tovarlar va xizmatlar narxining oshishi millionlab oilalarning turmush darajasiga salbiy taʼsir ko‘rsatib, norozilik kayfiyatining kuchayishiga sabab bo‘lgan.
To‘lovlar dasturi keng ko‘lamli norozilik namoyishlari davom etayotgan bir paytda eʼlon qilindi. Inson huquqlari faollarining maʼlumotlariga ko‘ra, namoyishlar mamlakat bo‘ylab 78 ta shahar va 222 ta aholi punktini qamrab olgan. Ayrim namoyishchilar ochiqchasiga Oliy rahbar Ali Xomanaiy boshchiligidagi rejimning isteʼfosini talab qilmoqda.
Shu bilan birga, vaziyat kuch ishlatish choralarining kuchayishi bilan kechmoqda. Inson huquqlari tashkilotlari maʼlumotiga ko‘ra, norozilik namoyishlari chog‘ida kamida 35 kishi, jumladan, uch nafar bola halok bo‘lgan, mingga yaqin fuqaro hibsga olingan. Ushbu holatlar Eron atrofidagi xalqaro xavotirni yana-da kuchaytirmoqda.
