Mubashshir Ahmadning himoya jamoasi og‘ir kasalliklari sabab uning ozod qilinishini talab qilmoqda
Advokatlar diniy bloger Alisher Tursunovning sog‘lig‘i bilan bog‘liq muammolar tufayli jazoni davom ettira olmasligini maʼlum qildi.
Mubashshir Ahmad taxallusi bilan tanilgan diniy bloger Alisher Tursunovning himoya jamoasi uning sog‘lig‘i bilan bog‘liq jiddiy muammolar sabab jazoni ijro etish koloniyasidan ozod etilishini talab qilmoqda.
Advokat Abdulloh Sodiqning Kun.uzga maʼlum qilishicha, 2025 yil oktyabr oyida 2,5 yilga ozodlikdan mahrum etilgan Tursunov hozirda Navoiy viloyatidagi 5-sonli jazoni ijro etish koloniyasida saqlanmoqda. Himoya tomoniga ko‘ra, mahkumning sog‘lig‘i keskin yomonlashgan va bu uning jazoni o‘tashini deyarli imkonsiz holga keltirgan.
Qayd etilishicha, Alisher Tursunov uzoq yillardan buyon II tur diabet bilan yashab kelgan. Qamoqxona sharoitida ushbu kasallik jiddiy asoratlarni keltirib chiqargan: qon bosimining doimiy yuqoriligi, osteoartrit, yurak-qon tomir muammolari, buyrak faoliyatining buzilishi hamda diabet fonida oyoqlarda kuchli shish va nekroz belgilari kuzatilayotgan yaralar paydo bo‘lgan.
Himoya tomonining bildirishicha, rasmiy maʼlumotlarda muntazam tibbiy yordam ko‘rsatilayotgani qayd etilgan bo‘lsada, mahkumning o‘zi advokatlari bilan uchrashuvlarda davolanish faqat tibbiy ko‘riklar va vaqtinchalik og‘riq qoldiruvchi inyeksiyalar bilan cheklanayotganini aytgan.
Shuningdek, sog‘lig‘idagi og‘ir holatga qaramay, Tursunov g‘isht ishlab chiqarish sexida ishlashga majbur etilayotgani, kuniga 16 soatgacha tik holatda bo‘lishi uning ahvolini yana-da og‘irlashtirayotgani taʼkidlanmoqda. Ikki qavatli karavotda yotishga majbur bo‘lishi esa yiqilish holatlariga ham olib kelgani aytilmoqda.
Himoya tomoni Jinoyat kodeksining 75-moddasiga tayanib, Tursunovni og‘ir kasalliklar ro‘yxatiga kiritilgan holatlar asosida jazodan ozod etish zarurligini bildirgan.
