O‘zbekistonda qariyb 20 ming fuqaroni Umraga noqonuniy yuborgan shaxslar qo'lga olindi

 

O‘zbekistonda qariyb 20 ming nafar fuqaroni Umra ziyoratiga noqonuniy ravishda yuborish bilan shug‘ullangan tashkilot faoliyati fosh etildi va to‘xtatildi.

 

Ichki ishlar vazirligi ma’lumotiga ko‘ra, mazkur sxema “Jalolquduq Aviatrans” kompaniyasi niqobi ostida faoliyat yuritgan norasmiy turizm biznesi tomonidan amalga oshirilgan.

 

Aniqlanishicha, Andijon viloyatidan bo‘lgan 41 yoshli ayol noqonuniy sayohatlarni tashkil etishda muhim rol o‘ynagan. U o‘zini norasmiy sayyohlik agenti sifatida tanishtirib, 19 500 nafar fuqaroni noqonuniy Umra safarlariga jalb qilgan.

 

2024–2025 yillar davomida fuqarolardan naqd pul ko‘rinishida jami 22,8 million dollar undirilgan. Huquqni muhofaza qiluvchi organlarning hisob-kitoblariga ko‘ra, davlat va jamoat manfaatlariga yetkazilgan zarar 1,8 milliard so‘mdan oshgan. Shuningdek, 15,3 milliard so‘mdan ortiq soliq va boshqa majburiy to‘lovlarni to‘lashdan bo‘yin tovlash holatlari aniqlangan.

 

Noqonuniy faoliyat oqibatida ziyoratchilarning o‘zlari ham jiddiy muammolarga duch kelgan. Xabarga ko‘ra, 534 nafar fuqaro Saudiya Arabistoniga yuborilgan bo‘lib, u yerda og‘ir ahvolga tushib qolgan va yetarli turar joy bilan ta’minlanmagan. Ularning barchasi keyinchalik maxsus reyslar orqali O‘zbekistonga qaytarilgan.

 

Mazkur holat yuzasidan jinoyat ishi qo‘zg‘atildi. Jami 14 nafar shaxsga ayblov e’lon qilingan, ulardan 13 nafari hibsga olingan. Hozirda tergov harakatlari davom ettirilmoqda.