Samarqandda erkak 200 grammga yaqin mixni yutib yubordi
Erkak kuchli stress holatida bo'lib, o'z harakatlarini nazorat qila olmagan.
Samarqand viloyatida 29 yoshli erkak oshqozoniga yot jismlar tushib ketgani sababli shoshilinch tibbiy yordamga murojaat qildi. Respublika shoshilinch tibbiy yordam ilmiy markazining viloyat filialiga fuqaro qorin sohasidagi kuchli og‘riqlar bilan olib kelingan.
Markaz axborot xizmatining ma’lum qilishicha, shoshilinch qabul bo‘limida o‘tkazilgan diagnostik va laborator tekshiruvlar natijasida bemorning oshqozon-ichak tizimida ko‘p miqdorda metall buyumlar — mix va samorezlar borligi aniqlangan.
Shifokorlar bemorga zudlik bilan jarrohlik amaliyoti o‘tkazish zarurligi haqida xulosa chiqargan. Oliy toifali shifokor Yo‘ldosh Quliyev rahbarligida barcha zarur tayyorgarlik ishlari amalga oshirilib, laparotomiya va gastrostomiya usulida operatsiya o‘tkazilgan.
Jarrohlik amaliyoti davomida bemorning oshqozonidan umumiy og‘irligi qariyb 200 grammni tashkil etuvchi metall jismlar olib tashlangan. Operatsiya bir soatga yaqin vaqt davom etgan.
Hozirda bemorning ahvoli qoniqarli baholanmoqda, u mustaqil harakatlana oladi va shifokorlar nazorati ostida davolanishni davom ettirmoqda.
Aniqlanishicha, fuqaro kuchli stress holatida bo‘lgan va o‘z harakatlarini nazorat qila olmagan holda metall buyumlarni yutib yuborgan.
