Toshkentdagi tunnelda erkak ayolga uyatsiz qiliq qildi
30 yoshli ayolga shahvoniy harakat qilgan 34 yoshli erkak ushlandi.
Ijtimoiy tarmoqlarda noma’lum shaxs tomonidan ayol kishiga nisbatan uyatsiz harakat sodir etilgani haqidagi xabarlar tarqalib, keng muhokamalarga sabab bo‘lmoqda. Mazkur holat yuzasidan Toshkent shahar Ichki ishlar bosh boshqarmasi quyidagilarni ma’lum qildi.
Joriy yilning 6-yanvar kuni taxminan soat 18:50 da Toshkent shahri Uchtepa tumani Lutfiy ko‘chasida noma’lum shaxs 1996-yilda tug‘ilgan L.Q.ga nisbatan uyatsiz buzuq harakat sodir etib, voqea joyidan yashiringan.
Mazkur holat yuzasidan Toshkent shahar IIBB tomonidan o‘tkazilgan tezkor-qidiruv tadbirlari natijasida gumonlanuvchining shaxsi aniqlangan. U 1993-yilda tug‘ilgan V. Andrey bo‘lib, ichki ishlar organlari xodimlari tomonidan ushlangan.
Hozirda ushbu holat yuzasidan Uchtepa tumani IIO FMB tomonidan tergovga qadar tekshiruv ishlari olib borilmoqda. Tekshiruv yakunlariga ko‘ra, qonunchilikda belgilangan tartibda qonuniy qaror qabul qilinishi ta’minlanadi.
