“Yovvoyi to‘ng‘iz deb o‘ylaganman” — Jizzaxda ovchi sherigini otib qo‘ydi

 

Jizzax viloyatida ov paytida ehtiyotsizlik oqibatida inson o‘limi bilan yakunlangan hodisa yuz berdi. Bu haqda Kun.uz xabar berdi.

 

Sud hukmida qayd etilishicha, Samarqand viloyati Ishtixon tumanida yashovchi 31 yoshli fuqaro G‘.A. 2025-yil 5-oktabr kuni uch nafar tanishi bilan ov qilish maqsadida Jizzax viloyati Mirzacho‘l tumaniga borgan. Ular tuman hududidagi Gulzor mahallasiga qarashli dala maydonida yovvoyi to‘ng‘iz ovlashni rejalashtirgan va ovchilar qamishzor orasida turli joylarga berkinishgan.

 

G‘.A. berkinib o‘tirgan vaqtda uning sherigi O‘.M. qamishlar orasidan yaqinlashgan. Atrof qorong‘i bo‘lgani sababli G‘.A. uni yovvoyi hayvon deb o‘ylab, ehtiyotsizlik bilan ov qurolidan bir marotaba o‘q uzgan. Otilgan o‘q O‘.M.ning bosh miyasining orqa qismi chap tomoniga tegib, og‘ir jarohat yetkazgan.

 

Jarohatlangan fuqaro zudlik bilan shifoxonaga olib borilgan, biroq ko‘rsatilgan tibbiy yordamga qaramay, vafot etgan.

 

Sud jarayonida rasmiy ro‘yxatdan o‘tgan va ikki yildan buyon ovchilik bilan shug‘ullanib kelgan G‘.A. aybiga iqror bo‘lib, sherigini bilmasdan otib qo‘yganini bildirgan. U hodisa vaqtida atrof qorong‘i bo‘lganini, marhum yaqin do‘sti ekanini aytib, suddan yengillik so‘ragan.

 

Mirzacho‘l tumani jinoyat ishlari bo‘yicha sudining hukmi bilan G‘.A. O‘zbekiston Respublikasi Jinoyat kodeksining 102-moddasi 1-qismi (ehtiyotsizlik orqasida odam o‘ldirish) bilan aybli deb topildi.

 

Sud hukmiga ko‘ra, unga 1 yil muddatga ov qilish huquqidan mahrum etish hamda ish haqining 20 foizini davlat daromadi hisobiga ushlab qolgan holda 1 yil 6 oy axloq tuzatish ishlari jazosi tayinlandi.