Uchtepada mansabdor shaxs pora bilan qo‘lga olindi
Hokimiyat vakili tadbirkordan noqonuniy ravishda 3 ming dollar talab qilgan.
Korrupsiya jamiyat taraqqiyotiga jiddiy tahdid soluvchi illat sifatida adolat va qonun ustuvorligiga putur yetkazishi taʼkidlanmoqda. Shu kabi holatlarni bartaraf etish maqsadida Davlat xavfsizlik xizmati hamda Toshkent shahar Ichki ishlar bosh boshqarmasi hamkorligida navbatdagi tezkor tadbir o‘tkazildi. Bu haqda Zamon.uz ga DXX xabar berdi.
Tadbir davomida Uchtepa tumani hokimligining Uy-joy kommunal xizmat ko‘rsatish va obodonlashtirish bo‘limi bosh mutaxassisi tadbirkordan noqonuniy ravishda 3 ming AQSH dollari olayotgan paytida ashyoviy dalillar bilan ushlandi. Maʼlum bo‘lishicha, u joriy yilda buzilishi lozim bo‘lgan savdo obyektlari ro‘yxati tuzilayotganini bahona qilib, tadbirkorga tegishli do‘konni ushbu ro‘yxatga kiritmaslik evaziga pul talab qilgan.
Hokimiyat vakili o‘zining tuman hokimligida yuqori lavozimda ishlovchi yaqin aloqalari borligini ro‘kach qilib, do‘kon buzilmasligini vaʼda qilgan. Ammo ushbu noqonuniy harakat o‘z vaqtida fosh etildi.
Hozirda mansabdor shaxsga nisbatan Jinoyat kodeksining 168-moddasi 3-qismi “v” bandi hamda 28, 211-moddasi 1-qismi asosida jinoyat ishi qo‘zg‘atildi. Unga nisbatan “qamoq” ehtiyot chorasi qo‘llanilgan. Ayni paytda tergov harakatlari davom etmoqda.
