Ukrainadagi mojaro iyun oxirigacha tugashi mumkin — Zelenskiy
Ukraina prezidenti muzokaralar yangi bosqichga chiqqani va urush yaqin oylar ichida yakunlanishi ehtimoli borligini bildirdi.
Ukrainadagi mojaro 2026 yil iyun oyi oxiriga qadar tugashi mumkin. Bu haqda Ukraina prezidenti Vladimir Zelenskiy Kiprning Yevropa Ittifoqi Kengashiga raisligi ochilish marosimida maʼlum qildi, deya xabar bermoqda gazeta.ru.
Zelenskiyning aytishicha, Yevropadagi hamkorlar, shuningdek, AQSH va koalitsiyaning boshqa aʼzolari bilan olib borilayotgan muzokaralar yangi bosqichga ko‘tarilgan. Uning taʼkidlashicha, urush Kiprning Yevropa Ittifoqi Kengashiga raislik muddati davomida yakunlanishi mumkin. Maʼlumki, Kiprning mazkur raislik muddati 30 iyunda tugaydi.
Shuningdek, Zelenskiy dekabr oyi oxirida Fox Nevs telekanaliga bergan intervyusida ukrainaliklarning 87 foizi tinchlik tarafdori ekanini, biroq fuqarolarning 85 foizi Ukraina qo‘shinlarining Donbassdan olib chiqilishiga qarshi ekanini bildirgan. Uning so‘zlariga ko‘ra, qo‘shinlarni Donbassdan olib chiqish Ukraina uchun “eng yomon ssenariy” bo‘lib, mamlakat xavfsizligiga jiddiy tahdid soladi va jamiyat tomonidan nomaqbul hisoblanadi.
Eslatib o‘tamiz, 6-yanvar kuni Ukraina prezidenti Vladimir Zelenskiy, Buyuk Britaniya bosh vaziri Keyr Starmer va Fransiya prezidenti Emmanuel Makron Parij shahrida mojaro yakunlanganidan so‘ng Ukrainada ko‘p millatli kuchlarni joylashtirish bo‘yicha deklaratsiyani imzolagan. Biroq mazkur masalada har bir davlatning aniq majburiyatlari hozircha loyiha bosqichida qolmoqda.
