Netanyaxu Livanda yangi harbiy operatsiya o‘tkazish uchun AQSH roziligini oldi — KAN
Operatsiya “Hizbulloh” harbiy tuzilmalarini qurolsizlantirishga qaratilgan.
Isroil Livan hududida yangi harbiy operatsiya o‘tkazish uchun AQSHning roziligini olgan. Bu haqda Isroilning KAN davlat teleradiokompaniyasi xabar berdi deydi TASS.
Manbalarga ko‘ra, Isroil bosh vaziri Benyamin Netanyaxu hukumat aʼzolariga AQSH prezidenti Donald Tramp ushbu operatsiyani o‘tkazishga ruxsat berganini maʼlum qilgan. Rejalashtirilayotgan operatsiyaning asosiy maqsadi “Hizbulloh”ning harbiy tuzilmalarini qurolsizlantirishdan iborat.
Qayd etilishicha, Qo‘shma Shtatlarga “Hizbulloh” qurolsizlanmagan taqdirda, Isroil bu jarayonni mustaqil ravishda amalga oshirish niyatida ekani yetkazilgan. Bu esa Isroilning shimoliy hududlarida yangi jangovar harakatlar boshlanishi va bir necha kun davom etadigan to‘qnashuvlarga olib kelishi mumkin.
Eslatib o‘tilishicha, 2025 yil dekabr oyida Livan bosh vaziri Navaf Salam mamlakat hukumati Litani daryosining shimolidagi hududlarda faoliyat yuritayotgan qurollangan guruhlarni qurolsizlantirish rejasining ikkinchi bosqichiga o‘tishga tayyor ekanini bildirgan edi.
Shuningdek, Salam Livan armiyasi o‘z vazifalarini to‘liq ado etishi uchun xalqaro hamjamiyat tomonidan harbiy va moliyaviy yordam zarurligini taʼkidlagan.
