Koreyalik olim Toshkentda ilmiy maqolalarni nufuzli jurnallarda chop etish bo‘yicha seminar o‘tkazdi
Tadbir yakunida Yong-Ill Leega faxriy professorlik unvoni topshirildi.
Ilmiy izlanishlarning sifatli natija berishi va amaliy ahamiyat kasb etishi uchun ularning xalqaro miqyosda tan olinishi muhim hisoblanadi. Shu maqsadda Toshkent vaksina va zardoblar ilmiy-tadqiqot institutiga xalqaro ilmiy hamjamiyatda e’tirof etilgan koreyalik olim, nufuzli ilmiy jurnallar muharriri Yong-Ill Lee tashrif buyurdi.
Tashrif doirasida institutda “Ilmiy ishlar va ilmiy maqolalarni samarali yozish: nufuzli jurnallarda chop etilish yo‘llari” mavzusida ilmiy-amaliy seminar tashkil etildi.
Seminar davomida ishtirokchilarga ilmiy maqola yozishning asosiy tamoyillari, xalqaro ilmiy jurnallar talablari, muharrirlarning baholash mezonlari, shuningdek, ilmiy ishlarni yuqori reytingli jurnallarda chop ettirish bo‘yicha amaliy tavsiyalar taqdim etildi. Bundan tashqari, muharrir nigohi bilan eng ko‘p uchraydigan xatolar va ularning oldini olish yo‘llari haqida atroflicha tushuntirish berildi.
Tadbir yakunida institut rahbariyati tomonidan Yong-Ill Leega ilm-fan rivojiga qo‘shgan hissasi va xalqaro ilmiy hamkorlikni mustahkamlashdagi xizmatlari uchun faxriy professorlik unvoni tantanali ravishda topshirildi.
Mazkur seminar ilmiy izlanishlarni global ilmiy maydonga olib chiqish, ilmiy maqola yozish madaniyatini yuksaltirish hamda yosh tadqiqotchilar uchun muhim amaliy bilim va tajribalar berish yo‘lida muhim ahamiyat kasb etdi.
