Farg‘onada bojxona posti rahbari pora bilan ushlandi
U 80 ta uyali telefonni noqonuniy olib kirishga ko‘maklashish evaziga 5 ming dollar talab qilgan.
Farg‘ona viloyatida chegara-bojxona posti rahbari pora olish bilan bog‘liq jinoyat ustida qo‘lga olindi. Bu haqda mahalliy telekanallardan birida namoyish etilgan videolavhada ma’lum qilindi. Holat huquqni muhofaza qiluvchi organlar tomonidan tezkor tadbir davomida fosh etilgan.
Ma’lumotlarga ko‘ra, bojxona posti rahbari Qirg‘izistondan olib kirilayotgan 80 dona uyali telefonni qonunga xilof ravishda o‘tkazib yuborish evaziga 5 ming AQSH dollari miqdorida pora olayotgan vaqtida ushlangan. Telefonlar tijorat maqsadida olib kelinayotgani aniqlangan.
Tergov jarayonida mansabdor shaxs xizmat vakolatlaridan foydalanib, davlat manfaatlariga zid harakat qilgani isbotlangan. Ushbu holat bojxona tizimida korrupsiyaga qarshi kurash doirasida ko‘rilgan navbatdagi chora sifatida baholanmoqda.
Sud qaroriga asosan, bojxona posti rahbari 4 yil muddatga ozodlikdan mahrum etildi. Shuningdek, unga 3 yil davomida bojxona organlarida ishlash taqiqi qo‘yildi.
