Minneapolisda AQSH Immigratsiya xizmati tomonidan ayol kishi otib o‘ldirilgani sababli minglab odamlar namoyishga chiqdi
Ayrim demokrat rahbarlar ICE reydlarini “keraksiz provokatsiya” deb atamoqda.
AQShning Minneapolis shahrida Immigratsiya va bojxona xizmati (ICE) xodimi tomonidan 37 yoshli ayol otib o‘ldirilgani ortidan minglab odamlar ko‘chalarga chiqdi. Reuters xabariga ko‘ra, norozilik aksiyalari davomida ayrim yo‘llar yopilgan, biroq jiddiy to‘qnashuvlar qayd etilmagan. Namoyishlar faqat Minneapolis bilan cheklanmay, mamlakatning boshqa shaharlarida ham davom etmoqda.
Hodisa 7-yanvar kuni ICE tomonidan o‘tkazilgan reyd vaqtida sodir bo‘lgan. Rasmiylarga ko‘ra, halok bo‘lgan ayol AQSh fuqarosi bo‘lgan. Shuningdek, 9-yanvar kuni Portlend shahrida ham ICE agentlari ikki kishini otib, ularni jarohatlagani ma’lum qilingan. Bu voqealar immigratsiya xizmatining amaliyotlariga nisbatan jamoatchilik noroziligini kuchaytirdi.
AQSh Ichki xavfsizlik vaziri ayol ICE xodimlarini avtomobil bilan bosib ketishga uringani, shundan so‘ng agentlardan biri o‘zini himoya qilish maqsadida o‘q uzganini bildirdi. Prezident Donald Tramp ham ushbu versiyani qo‘llab-quvvatladi. Biroq Minneapolis meri Jeykob Frey bu bayonotni qat’iyan rad etib, federal immigratsiya agentlarini shaharda tartibsizlik keltirib chiqarishda aybladi.
Mazkur voqea fonida AQShda immigratsiya siyosati, federal kuchlar va mahalliy hokimiyat o‘rtasidagi ziddiyatlar yanada keskinlashdi. Ayrim demokrat rahbarlar ICE reydlarini “keraksiz provokatsiya” deb atagan bo‘lsa, Nyu-York meri Zoh‘ran Mamdani kelgusida immigratsiya xizmati tekshiruvlariga yordam berilmasligini bildirdi. Shu bilan birga, Ichki xavfsizlik vazirligi Minnesota shtatida 2000 nafar xodim jalb etilgan keng ko‘lamli operatsiya davom etayotganini ma’lum qildi.
