Aksilkorrupsiya agentligi Ozodbek Nazarbekovni to‘yda pul olgani uchun jazolashni taklif qildi
Agentlikka ko‘ra, amaldagi qonunchilik davlat xizmatchilariga pedagogik, ilmiy va ijodiy faoliyatdan tashqari boshqa haq to‘lanadigan ishlar bilan shug‘ullanishni cheklaydi.
Avvalroq ijtimoiy tarmoqlarda O‘zbekiston madaniyat vaziri Ozodbek Nazarbekov to‘y marosimida qo‘shiq ijro etib, mehmonlar uzatgan pulni olayotgani aks etgan video haqida xabar berilgan edi. Ushbu holat foydalanuvchilar orasida qizg‘in muhokamalarga sabab bo‘lgan.
Mazkur video yuzasidan Korrupsiyaga qarshi kurashish agentligi Vazirlar Mahkamasiga rasmiy taklif kiritdi. Agentlik davlat xizmatchilarining odob-axloq me’yorlari buzilganini qayd etib, vazirni intizomiy javobgarlikka tortish masalasini ko‘rib chiqishni so‘radi. Shuningdek, unga qonunchilik talablariga qat’iy rioya etish bo‘yicha ogohlantirish berish taklif qilindi.
Agentlikka ko‘ra, amaldagi qonunchilik davlat xizmatchilariga pedagogik, ilmiy va ijodiy faoliyatdan tashqari boshqa haq to‘lanadigan ishlar bilan shug‘ullanishni cheklaydi. Bundan tashqari, mansabdor shaxslar xizmatdan tashqari paytda ham davlat xizmatining obro‘siga putur yetkazishi mumkin bo‘lgan harakatlardan tiyilishi lozim.
Madaniyat vazirligi esa ushbu holat yuzasidan izoh berib, video vazirlik xodimlaridan birining to‘yida tasvirga olinganini ma’lum qildi. Vazirlikka ko‘ra, vazir ushbu vaziyatni oldindan rejalashtirmagan, to‘y marosimlarida san’atkorlarga pul berish esa milliy urf-odatlarning bir qismi hisoblanadi. Shu bilan birga, Aksilkorrupsiya agentligi davlat xizmatchilarining xulq-atvori va axloqiy me’yorlariga rioya etilishi doimiy nazoratda bo‘lishini ta’kidladi.
