Tailandda o‘zbekistonlik 37 yoshli erkak voyaga yetmagan qizga jinsiy tajovuz qilgani uchun hibsga olindi
Qonunchilikka ko‘ra, gumonlanuvchi 10 yilgacha qamoq jazosiga hukm qilinishi mumkin.
Tailandda 37 yoshli O‘zbekiston fuqarosi 16 yoshli voyaga yetmagan qizga nisbatan jinsiy tajovuz sodir etganlikda gumonlanib hibsga olindi. Unga nisbatan 10 yilgacha ozodlikdan mahrum qilish jazosi qo‘llanishi mumkin.
The Pxuket News nashrining xabar berishicha, hodisa 11 yanvar kuni soat 22:20 atrofida Pxuket orolining May Khao hududida joylashgan Golden Sat restoranida sodir bo‘lgan.
Maʼlum qilinishicha, mahalliy hududda yashovchi 16 yoshli qiz hojatxonadan chiqayotgan paytda erkak tomonidan to‘xtatilgan. Gumonlanuvchi uni majburan orqaga tortib, nomaqbul harakatlar qilgan. Qizning qichqirig‘ini eshitgan restoran mijozlari voqea joyiga yetib kelib, erkakni huquqni muhofaza qiluvchi organlar yetib kelguniga qadar ushlab turgan.
Shundan so‘ng gumonlanuvchi politsiya tomonidan bo‘limga olib ketilgan.
Taʼkidlanishicha, mazkur holat Tailandning voyaga yetmaganlarga nisbatan jinsiy daxlsizlikni himoya qiluvchi qatʼiy qonunlari doirasida ko‘rib chiqilmoqda. Amaldagi qonunchilikka ko‘ra, roziliksiz teginish og‘ir jinoyat hisoblanadi va 10 yilgacha ozodlikdan mahrum qilish jazosi bilan jazolanadi.
