Toshkentda yuqori tezlikda avtomobil haydab, ikki kishining o'limiga sabab bo'lgan haydovchi 8 yilga qamaldi

 

Toshkent shahrida Cobalt avtomobilida yo‘l-transport hodisasi sodir etib, ikki kishining o‘limiga sabab bo‘lgan 27 yoshli haydovchiga sud hukmi o‘qildi. Jinoyat ishlari bo‘yicha Yangihayot tuman sudi qaroriga ko‘ra, u 8 yil muddatga ozodlikdan mahrum qilindi hamda 3 yilga barcha turdagi transport vositalarini boshqarish huquqidan mahrum etildi. Bu haqda “Ovoza” dasturi xabar bermoqda.

 

Fojea 2025-yil 31-avgust kuni yuz bergan. Ma’lumotlarga ko‘ra, 17 yoshli qiz va 24 yoshli yigit tanish haydovchidan ularni manzilga yetkazib qo‘yishni so‘ragan. Yo‘l davomida haydovchi tezlikni oshirib, avtomobil boshqaruvini yo‘qotgan va temir ustunga borib urilgan. To‘qnashuv oqibatida yo‘lovchilardan biri voqea joyida, ikkinchisi esa shifoxonada hayotdan ko‘z yumgan.

 

Sud jarayonida aniqlanishicha, ayblanuvchi avtomobilni yaqinda sotib olgan bo‘lib, bu uning ilk haydashlaridan biri bo‘lgan. Guvohlarning aytishicha, u soatiga 80–90 kilometr tezlikda harakatlangan. Haydovchining otasi sudda mashina qarzlarni yopish maqsadida olinganini va o‘g‘li atigi bir necha soat avtomobil boshqarganini bildirgan.

 

Marhumlarning yaqinlari sudda haydovchiga nisbatan da’volari yo‘qligini ma’lum qilib, yengilroq jazo so‘raganiga qaramay, sud jinoyatni og‘ir oqibatlarga olib kelgan deb baholadi. Shuningdek, sud qaroriga binoan, ayblanuvchidan 51,1 million so‘m moddiy zarar undirilishi belgilandi. Mutasaddilar bu kabi hodisalar yana takrorlanmasligi uchun haydovchilarni yo‘l harakati qoidalariga qat’iy rioya qilishga chaqirmoqda.