O’zbekiston samolyoti osmonda Rossiya samolyoti bilan to‘qnashib ketishiga oz qoldi
“Pobeda” aviakompaniyasining Samarqandga uchgan Boeing-737 va Termizdan Moskvaga uchgan Uzbekistan Airways aviakompaniyasining Airbus A320 samolyotlari orasida juda qisqa masofa yuzaga kelib, jiddiy aviatsiya hodisasi sifatida tasniflanmoqda.
Qozog‘iston matbuoti 10 yanvar kuni Chimkent dispetcherlari mas’ul bo‘lgan hududda ikkita avialaynerning xavfli yaqinlashuvi sodir bo‘lgani haqida yozdi.
Gap Vnukovo (Rossiya aeroporti) — Samarqand reysini amalga oshirgan “Pobeda” aviakompaniyasining Boeing-737 va Termizdan Moskvaga uchgan Uzbekistan Airways aviakompaniyasining Airbus A320 samolyotlari haqida ketmoqda.
Manbaga ko‘ra, bortlar orasidagi masofa shunchalik qisqa bo‘lganki, ikkala samolyotda ham TCAS (Traffic Collision Avoidance System) havodagi to‘qnashuvlarning oldini olish tizimi ishga tushgan. Xayriyatki, to‘qnashuv sodir bo‘lmagan.
“10-yanvar kuni, taxminan soat 5:42 da (Ostona vaqti bilan) Chimkent mintaqaviy ma’lumotlar markazining A2I sektorida Pobeda Airlines aviakompaniyasining Vnukovo-Samarqand yo‘nalishidagi PBD997 reysi va Uzbekistan Airways aviakompaniyasining Termez-Moskva yo‘nalishidagi UZB9609 reysi parvozlari paytida aviatsiya hodisasi yuz berdi”, — deyiladi Qozog‘iston Transport vazirligi xabarida.
Vazirlik mazkur hodisani jiddiy aviatsiya hodisasi sifatida tasniflanganini ta’kidladi. Bunday holatlar vakolatli organ tomonidan majburiy tekshiruvdan o‘tkazilishi kerak.
“Vazirlik jiddiy aviatsiya hodisasini tekshirish uchun komissiya tuzmoqda. Komissiyani tayinlash to‘g‘risidagi buyruq chiqarilgandan boshlab tergov hisoboti tasdiqlangunga qadar bo‘lgan tergov muddati odatda uch oydan oshmaydi, agar qo‘shimcha tadqiqot yoki tergov talab qilinmasa”, — deyiladi Qozog‘iston Transport vazirligi bayonotida.
