O‘zbekistonga sovuq antitsiklon kirib kelmoqda
Antitsiklon tufayli uch kun davomida havo ifloslanishi kuchayishi mumkin.
Respublika hududiga sovuq antitsiklon yaqinlashmoqda. Jarayon bosqichma-bosqich kechishi kutilmoqda va bu avval ekologik vaziyatning vaqtincha yomonlashishiga, keyinchalik esa havo haroratining sezilarli pasayishiga olib keladi.
O‘zgidromet maʼlumotlariga ko‘ra, antitsiklon kirib kelishi davrida atmosfera havosining almashinuvi sustlashadi. Natijada havoda ifloslantiruvchi moddalar hamda mayda chang zarralari — PM2.5 va PM10 konsentratsiyasi ortishi mumkin. Mutaxassislar prognoziga ko‘ra, yuqori darajadagi havo ifloslanishi uch kungacha saqlanib turishi ehtimoli bor.
Antitsiklon taʼsiri 16–17 yanvar kunlariga kelib kuchayadi. Ushbu davrda mamlakatning deyarli barcha hududlarida havo harorati pasayadi. Kunduzgi harorat pasayishi, kechasi va ertalab esa sovuqlar kuchayishi kutilmoqda.
Shu bilan birga, sovuq antitsiklon ayrim hududlarda qisqa muddatli yomg‘ir yoki qor yog‘ishini ham keltirib chiqarishi mumkin. Sinoptiklarning taʼkidlashicha, yog‘ingarchilik va kuchli shamollar atmosferada to‘plangan chang zarralarini kamaytirib, respublika bo‘ylab havo sifatining vaqtincha yaxshilanishiga xizmat qiladi.
