Prezident Shavkat Mirziyoyev Vatan himoyachilari kuni munosabati bilan bayram tabrigini yo‘lladi

 

O‘zbekiston Prezidenti, Qurolli Kuchlar Oliy Bosh Qo‘mondoni Shavkat Mirziyoyev O‘zbekiston Respublikasi Qurolli Kuchlari tashkil etilganining 34 yilligi hamda Vatan himoyachilari kuni munosabati bilan bayram tabrigini yo‘lladi.

 

Davlat rahbari tabrigida askar va serjantlar, ofitser va generallar, Qurolli Kuchlar faxriylari hamda barcha vatandoshlarni ushbu sana bilan samimiy muborakbod etdi. Prezident Vatan himoyasidek sharafli va mas’uliyatli burchni ado etib kelayotgan harbiy xizmatchilarning mamlakat mustaqilligi va hududiy yaxlitligini ta’minlashdagi beqiyos xizmatlarini alohida e’tirof etdi.

 

Shuningdek, Vatan oldidagi burchini bajarish chog‘ida mardlarcha halok bo‘lgan qahramonlar xotirasiga chuqur hurmat bajo keltirildi.

 

Tabrikda keyingi yillarda “O‘zbekiston – 2030” strategiyasi doirasida Qurolli Kuchlarning harbiy qudratini oshirish, boshqaruv va ta’minot tizimini modernizatsiya qilish, zamonaviy qurol-yarog‘ va harbiy texnika bilan ta’minlash borasida amalga oshirilayotgan islohotlar haqida so‘z yuritildi.

 

Prezident geosiyosiy vaziyat murakkablashib borayotgan bugungi sharoitda harbiy kadrlar tayyorlash, jangovar va ma’naviy salohiyatni yuksaltirish, ilg‘or axborot texnologiyalari va sun’iy intellekt asosidagi tizimlarni joriy etish ustuvor vazifa bo‘lib qolishini ta’kidladi.

 

Shuningdek, harbiy xizmatchilar va ularning oila a’zolarini ijtimoiy himoya qilish, ularning turmush farovonligini oshirish masalalariga ham alohida e’tibor qaratilishi bildirildi.

 

Tabrik yakunida Shavkat Mirziyoyev barcha Vatan himoyachilariga mustahkam sog‘liq, baxt-saodat va xizmat faoliyatida ulkan muvaffaqiyatlar tiladi.