“O‘zbekistonda xizmat ko‘rsatgan diplomat” unvoni ta’sis etiladi
Tashqi siyosat faoliyati konsepsiyasi yangilanadi va uning ustuvor yo‘nalishlari qayta ko‘rib chiqiladi.
.
Jahonda yuz berayotgan geosiyosiy o‘zgarishlar, xalqaro munosabatlardagi beqarorlik va global iqtisodiy transformatsiyalar sharoitida O‘zbekiston tashqi siyosatini milliy manfaatlar va zamon talablariga mos ravishda doimiy yangilab borish zarurligi ta’kidlandi. Bu haqda Prezident Shavkat Mirziyoyev o‘z nutqida qayd etdi.
Davlat rahbarining aytishicha, so‘nggi yillarda olib borilayotgan ochiq, pragmatik va muvozanatli tashqi siyosat natijasida O‘zbekistonning xalqaro maydondagi o‘rni va nufuzi sezilarli darajada mustahkamlandi. Shu bilan birga, global xavfsizlik arxitekturasidagi o‘zgarishlar va yangi iqtisodiy ittifoqlar tashqi siyosatda yanada faol va natijaga yo‘naltirilgan yondashuvni talab qilmoqda.
Shu munosabat bilan O‘zbekiston Respublikasining Tashqi siyosat faoliyati konsepsiyasini yangilash, uning ustuvor yo‘nalishlarini qayta ko‘rib chiqish hamda milliy manfaatlarni himoya qilishga qaratilgan aniq vazifalarni belgilash zarurligi qayd etildi. Yangi konsepsiya iqtisodiy diplomatiya, xavfsizlik, investitsiya, eksport, transport-logistika, suv va iqlim masalalarini o‘zaro bog‘liq holda qamrab olishi lozim.
Tashqi siyosat faoliyatini samarali tashkil etish maqsadida har bir elchixonaga yiliga qo‘shimcha 100–200 ming dollar mablag‘ ajratilishi belgilandi. Shuningdek, diplomatlar mehnatini munosib e’tirof etish uchun “O‘zbekiston Respublikasida xizmat ko‘rsatgan diplomat” faxriy unvonini ta’sis etish taklif etildi.
