Rossiyada o‘zbekistonlik erkak hamkasbini pichoqlagani uchun bir yilga qamaldi
Jazo muddati tugagach, sudlanuvchi Rossiyadan deportatsiya qilinadi.
Rossiyada ishlayotgan O‘zbekiston fuqarosi hamkasbiga pichoq bilan tan jarohati yetkazgani uchun sud hukmi bilan bir yilga ozodlikdan mahrum etildi.
Rossiyaning Yamalo-Nenets avtonom okrugi sudi 39 yoshli O‘zbekiston fuqarosini qasddan og‘ir tan jarohati yetkazishda aybdor deb topdi. Sud materiallariga ko‘ra, u hamkasbiga hayot uchun xavfli bo‘lgan tan jarohati yetkazgan.
Yamalo-Nenets avtonom okrugi prokuraturasi matbuot xizmatining maʼlum qilishicha, hodisa 2025-yil sentabr oyida Aksarka shahrida sodir bo‘lgan. Mojaro vaqtida ayblanuvchi jabrlanuvchining qorin qismiga pichoq bilan zarba bergan. Voqeadan so‘ng u huquqni muhofaza qiluvchi organlar tomonidan qo‘lga olinib, tergov hibsxonasiga joylashtirilgan.
Sud qaroriga muvofiq, erkak Rossiya Federatsiyasi Jinoyat kodeksining 111-moddasi 2-qismi — odam hayoti uchun xavfli bo‘lgan qasddan og‘ir tan jarohati yetkazish jinoyatini sodir etganlikda aybdor deb topilgan. Unga umumiy tartibli jazoni ijro etish koloniyasida bir yil muddatga ozodlikdan mahrum qilish jazosi tayinlangan.
Sud jarayonida sudlanuvchi o‘z aybini to‘liq tan olgani va qilgan ishidan pushaymonligini bildirgani qayd etilgan.
Maʼlumotlarga ko‘ra, hukm hozircha qonuniy kuchga kirmagan. Belgilangan jazoni o‘tab bo‘lgach, sudlanuvchi Rossiya hududidan deportatsiya qilinadi.
