O‘zbekistonda poyezdlar chiptalari narxlari 15 foizga oshirilmoqda
O‘zgarishlar xizmat sifati va ekspluatatsiya xarajatlari bilan izohlandi.
“O‘zbekiston temir yo‘llari” AJda amalga oshirilayotgan islohotlar doirasida yo‘lovchi tashish sohasida bozor tamoyillariga asoslangan tariflar shakllantirilgan. Bu haqda O‘zbekiston temir yo‘llari matbuot xizmati xabar berdi.
Yuqori tezlikda harakatlanuvchi elektropoyezdlarga texnik xizmat ko‘rsatish va ehtiyot qismlar xarajatlarining oshishi, elektr energiyasi hamda ekspluatatsiya xarajatlarining ko‘payishi, harakat xavfsizligini to‘liq ta’minlash, xizmatlar sifatini xalqaro standartlar darajasida saqlash, shuningdek, infratuzilmani doimiy modernizatsiya qilish zaruratini inobatga olib, 2026-yil 1-fevraldan boshlab “Afrosiyob” elektropoyezdlari chipta narxlari 15 foizga oshiriladi.
Yangilangan chipta narxlari quyidagicha belgilandi:
Toshkent — Buxoro
- VIP — 1 138 000 so‘m
- Biznes — 760 000 so‘m
- Ekonom — 509 000 so‘m
Toshkent — Qarshi
- VIP — 976 000 so‘m
- Biznes — 642 000 so‘m
- Ekonom — 429 000 so‘m
Toshkent — Samarqand
- VIP — 709 000 so‘m
- Biznes — 455 000 so‘m
- Ekonom — 311 000 so‘m
Shuningdek, “Sharq”, “Nasaf” va “O‘zbekiston” yo‘lovchi poyezdlari uchun ham chipta narxlari 15 foizga oshirildi.
Ma’lumot uchun, O‘zbekiston Respublikasi Prezidentining 2023-yil 10-oktabrdagi PQ-329-sonli qaroriga muvofiq, 2024-yil 1-yanvardan boshlab yuqori tezlikdagi va tezyurar poyezdlarda yo‘lovchi tashish tariflarini davlat tomonidan tartibga solish amaliyotidan voz kechilib, narxlar bozor mexanizmlari asosida shakllantirilgan.
