Janubiy Koreyaning sobiq prezidenti 5 yilga qamaldi

 

Seul markaziy okrug sudi 2024-yil dekabr oyida harbiy holat joriy etgan, jumladan hibsga olishga to‘sqinlik qilgan sobiq prezident Yun Sok Yolni besh yilga ozodlikdan mahrum etdi, deb xabar beradi Yonhap agentligi.

 

Bu hukm sobiq prezidentga nisbatan chiqarilgan birinchi qaror hisoblanadi. Korea Herald nashrining aniqlashicha, prokuratura Yun Sok Yolga nisbatan jami 10 yillik qamoq jazosini so‘ragan edi: hibsga olishga qarshilik ko‘rsatgani uchun besh yil, harbiy holat to‘g‘risidagi farmonni qayta ko‘rib chiqqani uchun ikki yil, vazirlar mahkamasi a’zolarining munozara huquqlarini buzganligi, xorijiy ommaviy axborot vositalarida yolg‘on ma’lumot tarqatgani va dalillarni yo‘q qilgani uchun esa uch yil.

 

Korrupsiya bo‘yicha tergov bosh inspeksiyasi (CIO) 2024-yil yanvar oyida Yun Sok Yolni xiyonat va isyon ishi bo‘yicha so‘roq qilishga chaqiruvlarni uch marta e’tiborsiz qoldirganidan so‘ng hibsga olishga uringan. Sud hibsga olish va tintuv orderini chiqardi, ammo prezident xavfsizlik xizmati bilan bir necha soatlik qarama-qarshilikdan so‘ng tergovchilar uni hibsga olishni to‘xtatdilar. Keyinchalik Yun hibsga olingan.

 

Sobiq prezidentga sakkizta ayblov bilan ish qo‘zg‘atilgan. Keyingi sud majlisi to‘ntarish uyushtirishda ayblanish masalasi bo‘yicha 2026-yil 19-fevralga belgilangan. Prokuratura Yun Sok Yolni sud va qonun chiqaruvchi hokimiyatni egallab olish orqali hokimiyatni saqlab qolishga intilgan to‘ntarish rahbari sifatida ta’riflab, unga o‘lim jazosini so‘ragan.