Qozog‘istonda sunʼiy intellekt imom ishga tushiriladi

 

Qozog‘istonda diniy-maʼrifiy sohada sunʼiy intellekt texnologiyalarini joriy etish rejalashtirilmoqda. Qozog‘iston Musulmonlari diniy boshqarmasi sunʼiy intellekt asosida ishlaydigan “Imom AI” mobil ilovasini ishlab chiqishni rejalashtirayotganini maʼlum qildi. Bu haqda Orda.kz nashri xabar berdi.

 

Qozog‘iston Oliy muftiysi Nauryzbay hoji Taganulining so‘zlariga ko‘ra, mazkur ilovani ishga tushirish 2026 yilga mo‘ljallangan. “Imom AI” ishonchli diniy manbalar asosida foydalanuvchilarning savollariga tezkor va aniq javoblar berishi kutilmoqda.

 

Bayonotda qayd etilishicha, zamonaviy talablarni inobatga olgan holda diniy sohada ham sunʼiy intellekt imkoniyatlarini tizimli joriy etish zarur. Loyiha fuqarolarning diniy savollariga oson va ishonchli javob olishiga xizmat qilishi bilan birga, imomlar va ruhoniylar zimmasidagi yukni kamaytirishi ham ko‘zda tutilgan.

 

Shuningdek, Qozog‘iston Prezidenti Qosim-Jomart Toqayev Yangi yil munosabati bilan qilgan murojaatida 2026 yilni Raqamlashtirish va sunʼiy intellekt infratuzilmasini rivojlantirish yili deb eʼlon qilgan edi. Prezidentning taʼkidlashicha, ilg‘or texnologiyalarni joriy etish mamlakatning barcha sohalardagi salohiyatini oshirishga xizmat qiladi.

 

Avvalroq O‘zbekiston Musulmonlar idorasi sun'iy intellektdan diniy savollarni so‘rash joiz emasligini maʼlum qilgan edi.