Rossiyada mehnat migrantlarini oldindan tanlash va tayyorlash tizimi joriy etiladi

 

Rossiya hukumatining qaroriga muvofiq, mamlakatda mehnat migrantlarini maqsadli jalb qilish bo‘yicha tajriba loyihasi amalga oshiriladi. Loyiha Moskva shahri va Moskva viloyatidan tashqari Rossiyaning barcha hududlarini qamrab oladi. Bu haqda TASS xabar berdi.

 

Tajriba doirasida xorijiy fuqarolar Rossiyaga kirishdan avval o‘z mamlakatlarida tanlab olinadi va ishga tayyorlashdan o‘tkaziladi. Buning uchun migrantlarni tanlash, o‘qitish va hujjatlashtirishga mo‘ljallangan maxsus infratuzilma yaratiladi.

 

Loyihani amalga oshirish uchun Rossiya Ichki ishlar vazirligi va Mehnat vazirligi boshqa tegishli federal idoralar bilan birgalikda masʼul etib belgilandi.

 

Hukumat hujjatiga ko‘ra:

• 2026-yil 15-mayga qadar tajribani o‘tkazish uchun zarur bo‘lgan federal qonun loyihalari ishlab chiqilib, hukumatga taqdim etiladi;
• 2026-yil 1-dekabrgacha Ichki ishlar vazirligi migrantlarni maqsadli yollash jarayonini taʼminlaydigan maxsus axborot tizimini ishga tushiradi;
• shu muddatga qadar Ichki ishlar vazirligi Raqamli rivojlanish vazirligi bilan hamkorlikda migrantlar uchun maxsus mobil ilova ishlab chiqadi;
• 2026-yil 10-dekabrgacha Rostrud va hududiy hokimliklar migrantlarni yollovchi ish beruvchilar uchun mehnat qonunchiligiga rioya etish bo‘yicha maslahat tadbirlarini o‘tkazadi (keyinchalik bu tadbirlar har yili davom ettiriladi).

 

Tajriba yakunlangach, Ichki ishlar vazirligi va Mehnat vazirligi boshqa manfaatdor idoralar bilan birgalikda 2030 yil 30 oktyabrgacha loyiha natijalarini Rossiya qonunchiligiga doimiy joriy etish bo‘yicha takliflar tayyorlaydi.