Sovuq sabab elektr energiyasida cheklovlar bo‘lishi mumkin —Energetika vazirligi

 

 

 

Havo haroratining keskin pasayishi kutilayotgani munosabati bilan yoqilg‘i-energetika tizimi kuchaytirilgan ish rejimiga o‘tkazildi. Bu haqda Energetika vazirligi xabar berdi. Qayd etilishicha, sovuq ob-havo sharoitida elektr, issiqlik va gaz ta’minotining barqaror ishlashini ta’minlash maqsadida qator tezkor choralar ko‘rilmoqda.

 

Ma’lumotlarga ko‘ra, energetika obyektlarida qo‘shimcha texnik ko‘riklar o‘tkazilib, ishlab chiqarish va yetkazib berish quvvatlari mavjud ob-havo sharoitiga moslashtirilgan. Mas’ul xizmatlar tunu kun ishlamoqda hamda yuzaga kelishi mumkin bo‘lgan nosozliklarni tezkor bartaraf etishga tayyor holatga keltirilgan.

 

Sovuq kunlarda energiya resurslariga bo‘lgan talab ortishi sababli ayrim hududlarda vaqtinchalik texnik cheklovlar kuzatilishi mumkin. Shunga qaramay, aholi va ijtimoiy ahamiyatga ega obyektlarni barqaror energiya bilan ta’minlash ustuvor vazifa bo‘lib qoladi. Fuqarolardan elektr energiyasi va tabiiy gazdan oqilona foydalanish, isitish uskunalaridan tejamkorlik bilan foydalanish so‘ralmoqda.

 

Shuningdek, xavfsizlik choralariga qat’iy rioya etish muhimligi ta’kidlandi. Isitish qurilmalarini qarovsiz qoldirmaslik, xonalarni muntazam shamollatib turish, dudburon va ventilyatsiya tizimlarining soz holatda ekanini tekshirish zarur. Is gazidan zaharlanishning oldini olish maqsadida yopiq joylarda ochiq olov yoki nosoz isitish uskunalaridan foydalanmaslik, imkon qadar is gazi aniqlagich qurilmalardan foydalanish tavsiya etildi. Energiya ta’minoti bo‘yicha murojaatlar uchun elektr energiyasi yuzasidan 1154, gaz ta’minoti bo‘yicha esa 1104 va 104 raqamlari orqali bog‘lanish mumkin.