Taftish.uz saytining besh xodimi tovlamachilik va firibgarlikda gumonlanib ushlandi — IIBB
Hozirda ularga nisbatan tuhmat va yolg‘on axborot tarqatish holatlari bo‘yicha ham tekshiruv davom etmoqda.
Toshkent shahrida 16-yanvar kuni 1988-yilda tug‘ilgan Gʻayrat Aberayev hamda “Taftish.uz” xodimlari 1992-yilda tug‘ilgan Azizjon Yuldashev, 2000-yilda tug‘ilgan Sardor Xamidov, 2006-yilda tug‘ilgan Marjona Eshquvvatova hamda 1998-yilda tug‘ilgan Dilshod Nishonov tovlamachilik va firibgarlikda gumon qilinib, protsessual tartibda qo‘lga olindi. Bu haqda Toshkent shahar IIBB matbuot xizmati xabar berdi.
Ma’lum qilinishicha, ushbu shaxslar O‘zbekiston Respublikasi Jinoyat kodeksining 165-moddasi (Tovlamachilik) va 168-moddasi (Firibgarlik) bilan ko‘zda tutilgan jinoyatlarni sodir etganlikda gumon qilinmoqda.
Hozirda ularning jinoyatlarga aloqadorligi bo‘yicha, shuningdek, Jinoyat kodeksining 139-moddasi (Tuhmat) va 244/6-moddasi (Yolg‘on axborot tarqatish) bilan bog‘liq holatlar tekshirilmoqda.
