Elektr taʼminoti korxonasi xodimi kaltaklangan — qonun nima deydi?
Rasul Kusherbayev elektrchilar vakolatlari va fuqarolarning huquqlari bo‘yicha muhim tushuntirish berdi.
Ijtimoiy tarmoqlarda elektr ta’minoti korxonasi xodimi kaltaklangani haqidagi xabarlar keng muhokamalarga sabab bo‘lmoqda. Ushbu holat yuzasidan Rasul Kusherbayev o‘zining ijtimoiy tarmoqdagi sahifasida amaldagi qonunchilik normalariga e’tibor qaratdi.
Uning ta’kidlashicha, Vazirlar Mahkamasining 319-son qaroriga muvofiq, elektr ta’minoti xodimlari faoliyati qat’iy tartiblar bilan cheklangan. Jumladan, agar iste’molchi xodimni hududga kiritmasa, elektr energiyasi faqat asosiy ulanish nuqtasidan, ya’ni turar joy ichiga kirmagan holda uzilishi shart.
Shuningdek, elektr hisoblagichini tekshirish faqat xodimning shaxsiy guvohnomasi asosida amalga oshiriladi. Bunda fuqarolarning turar joy daxlsizligi buzilmasligi lozimligi alohida qayd etilgan.
Rasul Kusherbayev Konstitutsiyaga ko‘ra turar joy daxlsiz ekani, hech bir mansabdor shaxs yoki xizmat ko‘rsatuvchi xodim kuch ishlatish yoki noqonuniy ravishda uyga kirishga haqli emasligini ta’kidladi. Mazkur holatlar yuzasidan mas’ul idoralar tomonidan qonuniy baho berilishi zarurligi qayd etildi.
