Metan zapravkalardagi cheklovlar sabab benzin chiqarish hajmi oshiriladi
Kunlik avtobenzin savdosi 5 ming tonnagacha oshiriladi.
“O‘zbekneftgaz” AJ tomonidan birja savdolariga chiqarilayotgan avtobenzin hajmi mavjud talabdan kelib chiqqan holda oshiriladi.
"O'zbekneftgaz" AJ matbuot xizmatining ma'lum qilishicha, sovuq havo oqimi sabab avtomobillarga gaz to‘ldirish kompressor shoxobchalari (metan zapravkalar) faoliyatiga qisqa muddatli cheklovlar kiritilayotgani munosabati bilan aholining yoqilg‘iga bo‘lgan ehtiyojini qondirish maqsadida birja savdolariga chiqariladigan avtobenzin hajmi ko‘paytirilmoqda.
Xususan, shu kungacha birja savdolariga kuniga o‘rtacha 3 700 tonna miqdorida avtobenzin chiqarib kelingan bo‘lsa, endilikda talab va taklifdan kelib chiqqan holda ushbu ko‘rsatkich 5 000 tonnagacha oshiriladi.
Mazkur choralar yoqilg‘i bozorida barqarorlikni ta’minlash, narxlarning keskin o‘zgarib ketishining oldini olish hamda iste’molchilar ehtiyojini uzluksiz qondirishga qaratilgan.
