Aholini ro‘yxatga olishda kiritilgan maʼlumotlar maxfiy bo‘lib, soliq yoki boshqa idoralarga uzatilmaydi — Statistika qo‘mitasi
Onlayn ro‘yxatga olishda OneID login va parollarini uchinchi shaxslarga berish qonunchilikka zid ekani va salbiy oqibatlarga olib kelishi mumkinligi haqida rasmiy ogohlantirish berildi.
Ayrim ijtimoiy tarmoqlarda ro‘yxatga olish savolnomasini boshqa shaxslar tomonidan to‘ldirib berish bahonasida fuqarolardan shaxsiy identifikatsiya maʼlumotlari, jumladan OneID tizimiga kirish login va parollari talab etilayotgani haqida xabarlar tarqalmoqda.
Shu munosabat bilan taʼkidlab o‘tiladiki, ro‘yxatga olish savolnomasi har bir fuqaro tomonidan shaxsan, mustaqil ravishda to‘ldirilishi shart. O‘ziga yoki oila aʼzolariga tegishli shaxsiy maʼlumotlarni uchinchi shaxslarga taqdim etish qonunchilik talablariga zid bo‘lib, maʼlumotlardan g‘arazli maqsadlarda foydalanilishi kabi salbiy oqibatlarga olib kelishi mumkin.
Fuqarolarga shaxsiy maʼlumotlar daxlsizligini taʼminlash maqsadida onlayn ro‘yxatdan o‘tish jarayonini o‘zlari mustaqil amalga oshirish qatʼiy tavsiya etiladi.
Onlayn ro‘yxatdan o‘tish jarayonida savolnomaga oila aʼzolari ham kiritilgan bo‘lsa, ularning barchasi aholini ro‘yxatga olish jarayonidan to‘liq o‘tgan hisoblanadi. Bu amaldagi qonunchilik talablariga to‘liq mos keladi.
Axborot tizimi tomonidan sertifikat faqat bitta — asosiy respondent nomi bilan shakllantiriladi. Shu bois, har bir oila aʼzosi uchun alohida sertifikat avtomatik ravishda berilmaydi.
Biroq census.stat.uz portali orqali shakllantirilgan sertifikatning quyi qismida onlayn ro‘yxatdan o‘tgan barcha oila aʼzolarining to‘liq ro‘yxati aks ettiriladi. Ushbu sertifikat ish joylari yoki boshqa tashkilotlarga taqdim etish orqali oila aʼzolarining ro‘yxatdan o‘tganini tasdiqlash mumkin.
- Savolnomada xonadonda amalda yashab turgan barcha oila aʼzolari haqidagi maʼlumotlar to‘liq kiritilishi lozim.
- Tomorqa (hovli) yer maydoni, undan foydalanish holati, mavjud chorva va parrandalar soni haqidagi maʼlumotlar aniq ko‘rsatilishi shart.
- Onlayn ro‘yxatdan o‘tishda doimiy propiska manzili emas, balki amalda yashab turgan manzil ko‘rsatiladi.
Taqdim etilgan maʼlumotlar soliq yoki boshqa davlat organlariga uzatilmaydi, ularning maxfiyligi qonunchilik bilan kafolatlangan.
Ro‘yxatga olish axborot tizimi kiritilgan maʼlumotlarni avtomatik tarzda tekshiradi. Xato yoki noaniqliklar aniqlangan taqdirda, 4–28 fevral kunlari mahalla yettiligi vakillari tomonidan qayta ro‘yxatga olish ishlari amalga oshirilishi mumkin.
Fuqarolardan savolnomani birinchi martayoq masʼuliyat bilan, to‘liq va ishonchli maʼlumotlar asosida to‘ldirish so‘raladi.
