Andijonda uch nafar voyaga yetmagan shaxs radar qurilmasini kanalga tashlab yubordi
O‘smirlar radarni yog‘och bilan urib tushirgan.
Andijon viloyatining Marhamat tumanida uch nafar voyaga yetmagan shaxs avtomatlashtirilgan foto va video qayd etish radarini o‘g‘irlashda gumonlanmoqda. Holat tumanning Kotarma mahallasi hududidan o‘tuvchi Asaka magistral yo‘lida sodir bo‘lgan.
IIV ma’lumotlariga ko‘ra, noma’lum shaxslar yo‘l harakati qoidalari buzilishini aniqlash uchun o‘rnatilgan radar qurilmasini urib tushirgan va keyinchalik yaqin atrofdagi sug‘orish kanaliga tashlab yuborgan.
9-yanvar kuni huquqni muhofaza qilish organlariga mazkur radar yo‘qolganligi haqida xabar kelib tushgan. O‘tkazilgan tezkor-qidiruv tadbirlari davomida jinoyat 26-dekabr kuni sodir etilgani aniqlangan.
Tergov jarayonida o‘smirlar qurilmani ag‘darish va joyidan sug‘urib olish uchun taxminan besh metrli yog‘och to‘sinlardan foydalangani ma’lum bo‘ldi.
Hozirda mazkur holatga aloqador uch nafar voyaga yetmagan shaxslar aniqlangan. Mazkur fakt yuzasidan Jinoyat kodeksining 169-moddasi (o‘g‘irlik) bilan jinoyat ishi qo‘zg‘atilgan. Tergov harakatlari davom etmoqda.
