Jizzaxda tanishini Tailandga fohishalik bilan shug‘ullanish uchun yubormoqchi bo‘lgan 18 yoshli qiz ushlandi
Qiz jabrlanuvchiga Bangkokda kuniga 400 dollargacha daromad va’da qilib, barcha xarajatlarni o‘z zimmasiga olgan.
Jizzax viloyatida o‘tkazilgan tezkor tadbir davomida odam savdosi bilan bog‘liq jinoyat fosh etildi. Ichki ishlar vazirligi Matbuot xizmatining ma’lum qilishicha, yosh qizni xorijga noqonuniy olib chiqishga urinish holati aniqlangan. Gumonlanuvchi tanishini Tailandga fohishalik bilan shug‘ullanish uchun yubormoqchi bo‘lgan.
Ma’lum bo‘lishicha, G‘allaorol tumanida yashovchi 19 yoshli qiz Sharof Rashidov tumanida istiqomat qiluvchi tengqurini Bangkok shahriga borishga ko‘ndirgan. U jabrlanuvchiga xorijda yuqori daromad topish, xususan, fohishalik orqali kuniga 350–400 dollar ishlash mumkinligini aytib ishontirgan. Shuningdek, safar bilan bog‘liq barcha xarajatlarni o‘zi qoplashini bildirgan.
12-yanvar kuni Toshkent–Bangkok yo‘nalishi bo‘yicha aviachiptalar rasmiylashtirilgan va qizlar Toshkent xalqaro aeroportiga yo‘l olgan. Biroq ular manzilga yetib bora olmagan. Huquq-tartibot idoralari xodimlari tomonidan Dўstlik tumanidagi “Manas-14” nazorat postida gumonlanuvchilar qo‘lga olingan.
Tekshiruv davomida qizlarning mobil telefonlari, xorijga chiqish pasportlari va aviachiptalari ashyoviy dalil sifatida rasmiylashtirilgan. Hozirda mazkur holat yuzasidan Jinoyat kodeksining 135-moddasi 2-qismi (odam savdosi) bilan jinoyat ishi qo‘zg‘atilgan. Tergov harakatlari davom etmoqda.
