Pokistonda savdo markazidagi yong‘inda halok bo‘lganlar soni 60 nafarga yetdi
Halok bo‘lganlarning shaxsi sud-tibbiy ekspertiza orqali aniqlanmoqda.
Pokistonning Karachi shahrida joylashgan yirik savdo markazida sodir bo‘lgan yong‘in oqibatida halok bo‘lganlar soni 60 nafarga yetdi. Qutqaruv xizmatlari voqea joyida qidiruv-qutqaruv ishlarini davom ettirmoqda.
Ma’lumotlarga ko‘ra, yong‘in 17-yanvar kuni savdo markazida kelib chiqqan. Anadolu ajansi nashrining xabar berishicha, qutqaruvchilar vayronalar ostidan yana 30 nafar qurbonning jasadini topgan. Halok bo‘lganlarning shaxsi sud-tibbiy ekspertiza orqali aniqlanmoqda.
Yong‘indan so‘ng o‘nlab odamlar bedarak yo‘qolgani haqida ham xabarlar mavjud bo‘lib, qidiruv ishlari shu yo‘nalishda davom ettirilmoqda.
Yong‘in sodir bo‘lgan savdo majmuasi taxminan 8 ming kvadrat metr maydonni egallagan bo‘lib, unda qariyb 1200 ta do‘kon joylashgan. Hodisa oqibatida binoning bir qismi qulab tushgan.
Hozircha yong‘inning kelib chiqish sabablari aniqlanmagan. Vakolatli idoralar tomonidan holat yuzasidan tekshiruv ishlari olib borilmoqda.
