Moskva Ramzan Qodirovning o'limiga tayyorgarlik ko‘rmoqda

 

So‘nggi haftalarda Checheniston rahbari Ramzan Qodirovning sog‘lig‘i bilan bog‘liq xabarlar fonida uning vorisi kim bo‘lishi mumkinligi haqidagi muhokamalar kuchaydi. Ayrim manbalarga ko‘ra, Grozniy va Moskva Qodirovdan keyingi davr ssenariylarini jiddiy muhokama qilmoqda.

 

“Novaya Gazeta Yevropa” nashrining xabar berishicha, 2025-yil dekabr oyi oxirida Ramzan Qodirov shoshilinch ravishda Moskvadagi tibbiyot muassasasiga yotqizilgan. 11-yanvar kuni Ukraina OAVlari razvedka manbalariga tayanib, Checheniston rahbari buyrak yetishmovchiligi bilan og‘ir ahvolda ekanini va uning qarindoshlari Moskva shahriga kelganini ma’lum qilgan.

 

Kreml va “Yagona Rossiya”ga yaqin manba “Muhim hikoyalar” nashriga bergan izohida Chechenistondagi vaziyat nihoyatda murakkab ekani va federal markaz muqobil yechimlar ustida ish olib borayotganini ta’kidlagan. Uning so‘zlariga ko‘ra, Qodirov tirik ekan, ochiq siyosiy jarayonlar kuzatilmaydi, biroq hududda ichki jarayonlar qat’iy nazorat ostida olib borilmoqda.

 

Manbalarga ko‘ra, ehtimoliy voris shaxs Qodirovlar oilasi xavfsizligini ta’minlay olishi, shuningdek, federal markaz uchun barqarorlikni saqlab qolish imkoniyatiga ega bo‘lishi kerak. Shu sababli vorislik masalasi Kreml uchun strategik ahamiyat kasb etmoqda.

 

Muhokamalarning kuchayishiga Ramzan Qodirovning 18 yoshli o‘g‘li Adam Qodirov bilan bog‘liq avtohalokat ham sabab bo‘lgan. U ayrim axborot manbalarida Chechenistonning kelajakdagi rahbari sifatida tilga olinmoqda. Biroq amaldagi qonunchilikka ko‘ra, Adam Qodirov 30 yoshga to‘lmaguniga qadar, ya’ni 2037-yilgacha respublikaga rahbarlik qila olmaydi.

 

OAV ma’lumotlariga ko‘ra, muqobil nomzodlar orasida Benoy teipi vakillari hamda Federal xavfsizlik xizmati bilan bog‘liq bo‘lgan Apti Alaudinov nomi tilga olinmoqda. Kreml hozircha rasmiy bayonot bermagan bo‘lsa-da, vaziyat Rossiya siyosiy doiralari tomonidan jiddiy baholanmoqda.