Toshkentdagi bog‘chada bolani uxlamagani uchun urgan tarbiyachi ishdan olindi
Bog‘cha ma’muriyati mazkur holat aniqlangach, tarbiyachi bilan mehnat shartnomasi bekor qilinganini bildirgan.
Toshkent shahridagi xususiy bog‘chalardan birida bolaga nisbatan zo‘ravonlik qilgan tarbiyachi ishdan bo‘shatildi. Bu haqda “Millar” ko'rsatuvi xabar berdi. Voqea Olmazor tumanida joylashgan “American Daycare” nodavlat maktabgacha ta’lim tashkilotida sodir bo'lgan.
Ma’lum qilinishicha, hodisa joriy yilning 22-yanvar kuni bo‘lgan. Tarbiyachi tushlik vaqtida uxlamagan bola bilan qo‘pol munosabatda bo‘lib, unga qo‘l ko‘targan. Bog‘cha ma’muriyati mazkur holat aniqlangach, tarbiyachi bilan mehnat shartnomasi bekor qilinganini bildirgan.
Bolaning onasi so‘zlariga ko‘ra, tarbiyachi barcha bolalar turganidan keyin uning farzandiga nisbatan zo‘ravonlik qilgan va natijada bolaning burni qonagan. “Bolamni kiyintirib, yuz-qo‘lini yuvib, yonimga tushirib yuborishganda men bog‘chaga kelgan edim”, — deydi u.
Poytaxt Maktabgacha va maktab ta’limi boshqarmasi ma’lumotiga ko‘ra, holat hozirda boshqarma tomonidan o‘rganilmoqda. O‘rganish yakunlariga ko‘ra, mazkur voqea yuzasidan qo‘shimcha rasmiy ma’lumot taqdim etilishi bildirilgan.
