Eronda internetga kirish bo‘yicha barcha cheklovlar olib tashlanadi
Internetni barcha shaharlarda qayta tiklash jarayoni bosqichma-bosqich amalga oshirilmoqda.
Eron prezidenti Mas’ud Pizishkiyon tegishli idoralarga internet bozorini jonlantirish hamda jamoatchilikning xalqaro internetga to‘liq kirishini ta’minlash uchun mavjud barcha cheklovlarni bekor qilish bo‘yicha topshiriq bergan. Hozirda ushbu jarayon bosqichma-bosqich amalga oshirilmoqda. Bu haqda The News nashri xabar bermoqda.
“Prezident xalqaro internetga erkin kirish jamiyat va iqtisodiyot uchun muhim ekanini ta’kidladi. Shu sababli cheklovlarni olib tashlash bo‘yicha aniq ko‘rsatmalar berildi”, — deyiladi xabarda.
Eslatib o‘tamiz, Eronda hukumatga qarshi namoyishlar kuchayganidan so'ng 8-yanvar kuni internetga kirish to‘liq cheklangan edi. Ushbu qaror mamlakat ichida va xalqaro maydonda keskin tanqidlarga sabab bo‘lgan.
Avvalroq prezidentning o‘g‘li va maslahatchisi Yusuf Pizishkiyon ham internetni o‘chirish norozilikni kamaytirmasligi, aksincha, hukumat va xalq o‘rtasidagi ishonch tafovutini chuqurlashtirishini aytib, cheklovlarni bekor qilishga chaqirgandi.
