Janubiy Koreyadagi zavod yong‘inida O‘zbekiston fuqarosi bedarak yo‘qoldi
Chungcheongbuk-do provinsiyasidagi zavodda yuz bergan yong‘inda 81 nafar ishchi evakuatsiya qilindi, ikki nafar xorijiy fuqaro bilan aloqa uzilgan.
Janubiy Koreyaning Chungcheongbuk-do provinsiyasida joylashgan maishiy gigiyena mahsulotlari ishlab chiqaruvchi zavodda yong‘in sodir bo‘ldi. Yonhap News agentligi ma’lumotiga ko‘ra, hodisa 30-yanvar kuni soat 14:56 atrofida noma’lum sabablar tufayli boshlangan.
Yong‘in qisqa vaqt ichida korxona hududidan tashqariga chiqib, qo‘shni ishlab chiqarish obyektlariga ham tarqalgan. Mazkur zavodda nam salfetkalar va bolalar tagliklari ishlab chiqariladi. Korxonada xavfli kimyoviy moddalar bilan ishlanmasligi bildirilgan.
Hodisa vaqtida zavodda bo‘lgan 83 nafar xodimdan 81 nafari evakuatsiya qilingan. Biroq Nepal va O‘zbekiston fuqarosi bo‘lgan ikki nafar ishchi bilan aloqa o‘rnatilmagan. Ular hozircha bedarak yo‘qolgan deb hisoblanmoqda.
Kuchli shamol sababli yong‘in taxminan 500 metr uzoqlikdagi tog‘ yonbag‘riga ham tarqalgan. Favqulodda xizmatlar tomonidan 2-darajali javob rejimi joriy etilib, 105 nafar qutqaruvchi, 56 ta maxsus texnika va 4 ta vertolyot jalb etilgan. Yong‘in soat 16:10 ga kelib nazorat ostiga olingan.
Ayni paytda voqea joyida tekshiruv ishlari davom etmoqda. Yong‘inning aniq kelib chiqish sabablari va yetkazilgan moddiy zarar miqdori keyinroq aniqlanishi ma’lum qilindi.
