Jizzaxda qora “Tracker”larga ov boshlangani aytilmoqda
MIB qora “Tracker”larning jarima maydoniga joylashtirilayotganiga izoh berdi.
Fuqarolik munosabatlari kengayib borayotgan bir paytda, sud va boshqa vakolatli organlar qarorlari asosida ijro hujjatlari soni ortib borayotgani tabiiy. Ijro hujjatlari Majburiy ijro byurosi ish yurituviga kelib tushgandan so‘ng, davlat ijrochilari tomonidan qonuniy majburiy ijro harakatlari amalga oshiriladi.
Qarzdorlik qarzdorning mulkiga qaratilgan taqdirda, ushbu mulkni yashirish qonun bilan taqiqlanadi va bu jiddiy huquqiy oqibatlarga olib keladi.
Jizzax viloyatida ayrim qarzdorlar davlat ijrochisining qonuniy talablarini bajarmasdan, o‘zlariga tegishli avtotransport vositalarini yashirishga uringan. Ammo natija o‘zini kuttirmadi: ijro hujjatlariga asosan 4 ta holatda “Tracker” rusumli avtotransport vositalari aniqlanib, jarima maydonlariga joylashtirildi.
Kelgusida ushbu avtotransportlar auksion savdolari orqali sotilib, tushgan mablag‘lar ijro hujjatlari bo‘yicha mavjud qarzdorligini qoplashga yo‘naltiriladi.
