Toshkent – Sankt-Peterburg yo‘nalishida avtobus qatnovi yo‘lga qo‘yiladi
Qatnovlar haftada ikki marta amalga oshiriladi.
2026-yil 23-fevraldan boshlab “Uzautotrans service” korxonasi Toshkent – Sankt-Peterburg – Toshkent yo‘nalishida muntazam avtobus qatnovlarini yo‘lga qo‘yadi. Bu haqda Transport vazirligi ma'lum qildi.
Ma’lum qilinishicha, ushbu yo‘nalish bo‘yicha reyslar haftada ikki marotaba — dushanba va juma kunlari amalga oshiriladi. Toshkentdan birinchi avtobus 23-fevral kuni soat 17:00 da “Toshkent” avtovokzalidan jo‘naydi. Chipta narxi 1 200 000 so‘m etib belgilangan.
Yo‘l davomida avtobus Moskva shahridagi “Novoyasenevskaya” avtovokzalida oraliq to‘xtashni amalga oshiradi va undan so‘ng Sankt-Peterburg avtovokzaliga yetib boradi.
Sankt-Peterburgdan Toshkentga qaytish reyslari ham dushanba va juma kunlari bajariladi. Avtobuslar Sankt-Peterburg avtovokzalidan mahalliy vaqt bilan soat 17:00 da jo‘naydi.
