Toshkent—Chorvoq yo‘lida tezlik 80 km/soatgacha pasaytiriladi
2025-yilda mazkur yo‘nalishda 63 ta YTH qayd etilgan.
Toshkent—Chorvoq avtomobil yo‘lining ayrim qismlarida harakat tezligi 80 km/soatgacha cheklanadi. Bu haqda xalq deputatlari Toshkent viloyati Kengashining tegishli qarori qabul qilindi.
Qarorga ko‘ra, davlat ahamiyatiga ega Bektemir—Chirchiq—G‘azalkent—Chorvoq (4R-12) avtomobil yo‘lining aholi punktlaridan tashqarida joylashgan 6 ta qismida ruxsat etilgan eng yuqori tezlik 100 km/soatdan 80 km/soatgacha pasaytirildi.
Hujjatda ta’kidlanishicha, ushbu chora-tadbirlar mazkur yo‘nalishda kuzatilayotgan yuqori avariyaviylik darajasi bilan bog‘liq. Xususan, 2025-yilda yo‘lning 19-kilometridan 74-kilometrigacha bo‘lgan qismida tezlik rejimiga rioya qilmaslik oqibatida 63 ta yo‘l-transport hodisasi qayd etilgan.
Mazkur YTHlar oqibatida 15 nafar fuqaro halok bo‘lgan, 50 nafar shaxs turli darajadagi tan jarohatlari olgan.
Qabul qilingan qaror yo‘l harakati xavfsizligini oshirish hamda baxtsiz hodisalar sonini kamaytirishga qaratilgan.
