Islomoboddagi koʻchalardan biriga Toshkent va yangidan barpo etiladigan bogʻga Zahiriddin Muhammad Bobur nomi berildi
Buyuk sarkarda va davlat arbobi Zahiriddin Muhammad Bobur nomi berilgan yangi bog‘ tarixiy meros va umumiy qadriyatlarga hurmat ifodasi sifatida e’tirof etilmoqda.
O‘zbekiston Prezidenti Shavkat Mirziyoyevning Pokistonga davlat tashrifi doirasida Islomobod shahridagi ko‘chalardan biriga Toshkent nomi, yangi barpo etiladigan bog‘ga esa Zahiriddin Muhammad Bobur nomini berish marosimi bo‘lib o‘tdi. Ushbu tadbir ikki davlat o‘rtasidagi do‘stlik va hamkorlikning muhim ramziy ifodasi sifatida baholandi.
Marosimda Pokiston Bosh vaziri Shahboz Sharif mazkur qaror O‘zbekiston va Pokiston o‘rtasidagi chuqur tarixiy hamda madaniy aloqalarni aks ettirishini ta’kidladi. Uning so‘zlariga ko‘ra, bu tashabbus ikki mamlakat o‘rtasidagi strategik sheriklik munosabatlari tobora mustahkamlanib borayotganining yana bir tasdig‘idir.
Islomobodda tashkil etilayotgan Toshkent ko‘chasi ikki xalq o‘rtasidagi yaqinlik va hamkorlikni ifodalovchi muhim ramzlardan biri bo‘lishi kutilmoqda. Shu bilan birga, buyuk sarkarda va davlat arbobi Zahiriddin Muhammad Bobur nomi berilgan yangi bog‘ tarixiy meros va umumiy qadriyatlarga hurmat ifodasi sifatida e’tirof etilmoqda.
Ta’kidlanishicha, Toshkent ko‘chasi va Bobur bog‘i O‘zbekiston va Pokiston xalqlari o‘rtasidagi do‘stlik, hurmat va o‘zaro ishonch rishtalarini yanada mustahkamlashga xizmat qiladi. Mazkur tashabbus ikki davlat o‘rtasidagi ko‘p qirrali hamkorlikni yangi bosqichga olib chiqishga qaratilgan muhim qadam sifatida baholanmoqda.
