Xitoy yadroviy qurollarni cheklash bo‘yicha muzokaralarda qatnashishdan bosh tortdi
Pekin AQSh va Rossiya arsenallari bilan solishtirganda o‘z yadroviy salohiyati ancha kichik ekanini ta’kidlab, asosiy mas’uliyat yirik davlatlar zimmasida ekanini bildirdi.
Xitoy yadroviy qurollarni nazorat qilish va qisqartirish bo‘yicha ehtimoliy xalqaro muzokaralarda qatnashmasligini ma’lum qildi. Bu haqda mamlakatning BMTning Jenevadagi bo‘linmasi huzuridagi vakili Tszyan Shen bayonot berdi.
Uning so‘zlariga ko‘ra, Xitoyning yadroviy salohiyati hajmi AQSh va Rossiya arsenallari bilan teng darajada emas. Shu sababli Pekin hozirgi bosqichda yadroviy qurollarni cheklash bo‘yicha ko‘p tomonlama muzokaralarda ishtirok etishni maqsadga muvofiq deb hisoblamayapti.
Xitoy vakili yadroviy qurolsizlanish borasidagi asosiy mas’uliyat eng katta yadroviy arsenalga ega davlatlar zimmasida bo‘lishi kerakligini ta’kidladi. Uning aytishicha, aynan shu davlatlar o‘z qurollarini sezilarli darajada va xalqaro nazorat ostida qisqartirish bo‘yicha aniq qadamlar tashlashi zarur.
Pekin rasmiylari bu masala bo‘yicha o‘z pozitsiyasini saqlab qolayotganini va mavjud global yadroviy muvozanatda o‘zining hozirgi darajasini alohida holat sifatida ko‘rayotganini bildirgan.
